काठमाडौँ । सिंहदरबारमा निर्माणाधीन नयाँ संसद् भवनको कामलाई तीव्रता दिँदै राष्ट्रियसभा अध्यक्ष नारायणप्रसाद दाहालले तोकिएकै समयमा निर्माण सम्पन्न गर्न सरोकारवाला निकायलाई कडा निर्देशन दिएका छन् । शुक्रबार सिंहदरबारमा निर्माण व्यवसायी र सहरी विकास मन्त्रालयका पदाधिकारीहरूसँग संयुक्त छलफल गर्दै उनले बाँकी रहेका कामहरू कुनै पनि बहानामा नरोकी शीघ्र सक्न निर्देशन दिएका हुन् । संसद् सचिवालयका सहसचिव एवं प्रवक्ता एकराम गिरीका अनुसार अध्यक्ष दाहालले भवन निर्माणमा देखिएका अवरोध हटाएर कामलाई गति दिन आग्रह गरेका छन्। छलफलका क्रममा निर्माण पक्षले हालसम्म आयोजनाको करिब ९३ प्रतिशत भौतिक प्रगति भइसकेको जानकारी गराएको छ ।